Veldu síðu
Veldu síðu
Innskráning
íbúðalánasjóður
Íbúðalánasjóður selur Klett

Íbúðalánasjóður selur Leigufélagið Klett ehf.

• Þrjú skuldbindandi tilboð bárust í Leigufélagið Klett ehf. í opnu söluferli í umsjón Virðingar
• Hæsta tilboðið reyndist 901 milljón kr. hærra en það lægsta
• Nýr eigandi mun halda leiguverði óbreyttu í að minnsta kosti 12 mánuði
• Söluverðið 1.541 millj. kr. hærra en bókfært virði félagsins

Íbúðalánasjóður hefur samþykkt kauptilboð í dótturfyrirtæki sitt, Leigufélagið Klett ehf. Félagið var stofnað árið 2013 utan um 450 leiguíbúðir sem voru í eigu sjóðsins. Í byrjun nóvember 2015 samþykkti meirihluti stjórnar Íbúðalánasjóðs að selja Leigufélagið Klett enda samrýmdist eignarhald sjóðsins á félaginu ekki lögbundnum langtímaverkefnum Íbúðalánasjóðs. Efnt var til opins söluferlis undir stjórn verðbréfafyrirtækisins Virðingar og reyndist mikill áhugi á meðal fjárfesta og annarra leigufélaga á að kaupa fyrirtækið.
Leigufélagið Klettur ehf. var auglýst til sölu á almennum markaði þann 25. febrúar 2016. Skömmu síðar, þann 2. mars, var haldinn opinn kynningarfundur þar sem félagið og söluferlið, sem skiptist í tvo hluta, var kynnt. Alls bárust átta tilboð í fyrri hluta söluferlisins. Í seinni hlutanum var gefinn kostur á að skila skuldbindandi tilboðum og bárust þrjú slík tilboð í félagið. Það munaði 901 milljón kr. á hæsta og lægsta tilboði.
Hæsta tilboðið átti Almenna leigufélagið eignarhaldssjóður, að fjárhæð 10.101 milljón kr. Ljóst er að salan mun bæta fjárhagsstöðu sjóðsins en söluverðið er 1.541 milljón kr. hærra en bókfært virði félagsins hjá Íbúðalánasjóði.
Almenna leigufélagið hefur skuldbundið sig til að halda umsaminni leigu núverandi leigutaka óbreyttri í að minnsta kosti 12 mánuði frá samþykkt kauptilboðs. Með kaupunum bætast 450 íbúðir við þær 550 sem Almenna leigufélagið er þegar með í almennri langtímaútleigu.
Stjórn Íbúðalánasjóðs lagði mikla áherslu á að Leigufélagið Klettur yrði selt í opnu og gagnsæju söluferli. Það var verðbréfafyrirtækið Virðing sem hafði umsjón með söluferlinu.

Ingibjörg Ólöf Vilhjálmsdóttir, stjórnarformaður Íbúðalánasjóðs: „Stjórn sjóðsins er afar ánægð með hversu margir fjárfestar sýndu Kletti áhuga. Í ljósi þess fjölda tilboða sem bárust sýnist okkur að vel hafi reynst að hafa söluferlið opið og gagnsætt. Stjórn lagði frá upphafi áherslu á að staðið yrði faglega og heiðarlega að utanumhaldi og framkvæmd sölunnar þar sem horft yrði til þess að hámarka virði eigna sjóðsins. Okkur virðist þetta hafa tekist mjög vel. Ákveðið var að fá utanaðkomandi aðila til að halda utan um sölu félagsins og var í því skyni leitað tilboða. Hagstæðasta tilboðið barst frá Virðingu hf. og á grundvelli þess var samið við fyrirtækjaráðgjöf Virðingar um utanumhald söluferlisins. Þrjú skuldbindandi tilboð bárust í Leigufélagið Klett sem voru öll yfir bókfærðu virði félagsins. Markmið stjórnar Íbúðalánasjóðs um að hámarka virði eigna sjóðsins var því náð og við teljum að vel hafi til tekist. Það er okkur mjög mikilvægt að styrkja leigumarkaðinn. Ég er ánægð með að Almenna leigufélagið hafi skuldbundið sig til að halda leigu óbreyttri í heilt ár frá kaupunum og sé með langtímaáhuga á leigumarkaðinum.„